ᐊᑏᖃᑎᒌᑦ

ᓄᓇᕗᒻᒥᐅᑕᐅᓂᑰᓪᓗᓂ ᐊᕙᑎᑦ ᐊᕐᕌᒍᐃᑦ ᐅᖓᑖᓄᑦ, ᑑᓂ ᑐᑭᓯᐅᒪᔪᖅ ᐊᑦᓱᕈᕈᑕᐅᖃᑦᑕᖅᑐᓂᑦ ᑲᔪᓯᑎᑦᓯᒐᓱᐊᕐᓂᕐᒥᑦ ᑐᓴᐅᒪᔪᓕᕆᓂᕐᒧᑦ ᓱᓇᒃᑯᑖᓂᑦ ᐊᖏᔪᒥᑦ ᐊᒻᒪᓗ ᐊᑦᓱᕈᕐᓇᖅᑐᒥᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᒥ. ᐱᓕᕆᐊᖃᖅᓯᒪᓪᓚᕆᓐᓂᖓ ᓄᓇᕗᒻᒥ ᒐᕙᒪᒃᑯᓐᓂ, ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂ, ᐃᓅᓯᕐᒧᑦ ᑮᓇᐅᔾᔭᓴᓐᓂᕐᒧᓪᓗ ᐃᓱᒫᓘᑕᐅᔪᓄᑦ, ᒐᕙᒪᓕᕆᓂᕐᒥᑦ, ᐊᕕᑦᑐᖅᓯᒪᔪᒥ ᐊᔾᔨᒌᙱᓐᓂᐅᔪᓂ, ᐃᓕᖅᑯᓯᕐᒥ, ᐱᖅᑯᓯᕐᓂ, ᐊᒻᒪᓗ ᐅᖃᐅᓯᖅ ᐱᕕᖃᖅᑎᑦᓯᔪᖅ ᑑᓂᒥᑦ ᐸᕐᓇᑦᑎᐊᕈᓐᓇᕐᓂᐊᕐᒪᑦ ᐊᒻᒪᓗ ᑲᔪᓯᑎᑦᓯᓗᓂ ᐱᓕᕆᐊᑦᓴᓂᑦ ᑐᕌᖓᑦᓯᐊᖅᑐᓂᑦ ᐱᔨᑦᓯᕋᖅᑕᒥᓄᑦ ᐊᒻᒪᓗ ᓄᓇᓕᐅᔪᓄᑦ.

ᑕᐃᒪᙵᓂ ᐱᒋᐊᖅᑕᐅᔪᒻᒪ ᐊᑏ−ᒎ 2003-ᒥ, ᐱᓕᕆᐊᖃᖅᓯᒪᔪᖅ ᐱᕐᔪᐊᓂ ᑐᓴᐅᒪᔪᓕᕆᓂᕐᒧᑦ ᐱᓕᕆᐊᑦᓴᓂᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ ᐊᒻᒪᓗ ᒐᕙᒪᑐᖃᒃᑯᓐᓄ, ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ ᐊᒻᒪᓗ ᓇᒻᒥᓂᖃᖅᑎᐅᔪᓄᑦ. ᑑᓂ ᓯᕗᓕᖅᑎᐅᓚᐅᖅᑐᖅ ᐊᑏ−ᒎᒃᑯᑦ ᒫᓐᓇᕈᓘᓚᐅᖅᑐᖅ ᐱᓕᕆᖃᑎᖃᖅᑎᓪᓗᒋᑦ ᓄᓇᕗᑦ ᒐᕙᒪᖓᓂ ᓴᖅᑮᓂᕐᒥᑦ ᐃᓄᓕᒫᓄᑦ ᐅᔾᔨᕈᓱᓕᖅᑎᑦᓯᓂᕐᒥᑦ ᐃᓱᒫᓘᑕᐅᔪᓂᒃ ᓲᕐᓗ ᑐᐹᑭᒥᑦ ᐊᑐᙱᓐᓂᖅᓴᐅᓂᕐᒥᑦ, ᐊᑐᑦᓯᐊᕐᓂᕐᒥᑦ ᐃᒥᐊᓗᒻᒥ ᐊᒻᒪᓗ ᐱᕈᖅᑐᕕᓂᕐᒥ.

ᐱᓕᕆᐊᕆᕙᑦᑕᖏᑦ ᐊᔾᔨᒌᙱᑦᑐᓂᑦ ᐸᐃᑉᐹᑎᒍᑦ ᐊᒻᒪᓗ ᐃᑭᐊᖅᑭᕕᒃᑯᑦ ᐱᓕᕆᐊᑦᓴᓂᑦ ᓴᖅᑭᔮᖅᑎᑦᓯᔪᑦ ᐊᔪᙱᑕᒥᓂ ᑲᑎᖅᓱᐃᓂᕐᒥᑦ ᐃᓱᒪᑐᓂᕐᒥᑦ ᐃᓱᒪᑦᓴᖅᓯᐅᖅᓯᒪᑦᓯᐊᖅᑐᒃᑯᑦ ᐱᔭᐅᔭᕆᐊᓕᓐᓂᒃ ᐊᔾᔨᐅᙱᑦᑐᓄᑦ ᐱᔨᑦᓯᕋᕈᑕᐅᔪᓄᑦ. ᒥᓚᓂ ᐃᖅᑲᓇᐃᔭᖅᓯᒪᓕᖅᑐᖅ ᐊᑏ-ᒎ ᑕᑯᒃᓴᑎᒍᑦ ᓯᐊᒻᒪᖅᑎᑦᓯᓂᒃᑯᓐᓄᑦ ᑕᐃᒪᙵᓂ 2004-ᒥ, ᐊᒻᒪᓗ ᐃᖃᓗᓐᓂᕐᒥᐅᑕᐅᓕᖅᑐᖅ ᐊᕐᕌᒍᓄᑦ ᒪᕐᕉᓐᓄᑦ ᓇᑉᐸᖓᓂᓪᓗ.

ᐸᐃᑉᐹᖅᑖᖅᓯᒪᔪᖅ ᑎᑎᖅᑐᒐᐅᔭᕐᓂᕐᒥᑦ ᐊᒻᒪᓗ ᓴᓇᒪᓂᕐᒥᑦ, ᐃᓕᓐᓂᐊᖅᓯᒪᑦᓯᐊᖅᑐᓂ ᐊᔾᔨᙳᐊᓂᑦ ᓴᓇᒪᓂᕐᒥᑦ. ᐱᔭᕇᖅᓯᓯᒪᒻᒥᔪᖅ ᐃᓕᓐᓂᐊᕈᑎᑦᓴᓂᑦ ᐃᓄᒋᐊᓄᑦ ᑐᓴᐅᒪᔪᓕᕆᓂᕐᒥᑦ ᐊᒻᒪᓗ ᐸᐃᑉᐹᖅᑖᖅᓯᒪᓪᓗᓂ ᑲᑐᔾᔨᖃᑎᒌᖑᔪᓂ ᓴᓇᒪᔪᓕᕆᔨᓂᑦ ᑲᓇᑕᒥ.

ᒫᓐᓇᕈᓘᓚᐅᖅᑐᖅ, ᒥᓚᓂ ᐱᓕᕆᐊᖃᓚᐅᖅᑐᖅ ᓴᓇᒪᑎᑦᓯᓂᕐᒥᑦ ᑖᑦᓱᒪᖓ “ᐅᔾᔨᖅᓱᖅᑕ” ᓄᓇᕗᑦ ᒐᕙᒪᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᖏᓐᓄᑦ. ᑖᓐᓇ ᐱᓕᕆᐊᑦᓴᖅ ᐱᓚᖃᖅᑐᖅ ᓇᓗᓇᐃᒃᑯᑕᓕᐅᕐᓂᕐᒥᑦ, ᐸᐃᑉᐹᑎᒍᑦ, ᖃᐅᔨᔭᐅᓇᓱᐊᕐᓂᕐᒥᑦ, ᐊᒻᒪᓗ ᑕᑯᑦᓴᐅᑎᑦᓯᓂᕐᒧᑦ ᐃᓗᓕᖏᑦ ᐊᑑᑎᓕᒻᒪᕆᐅᓂᕋᖅᑕᐅᓚᐅᖅᑐᖅ ᑕᑯᑦᓴᐅᔪᓂᑦ ᐱᓕᕆᐊᖃᕐᓂᕐᒧᑦ.

ᖃᐅᔨᒪᓂᖃᑦᓯᐊᖅᑐᖅ ᖃᐅᑕᒫᑦ ᐊᐅᓚᑦᓯᔾᔪᑎᓂᑦ ᐊᒻᒪᓗ ᐃᓚᐅᖃᑕᐅᑦᓯᐊᖅᑐᖅ ᐊᑏ−ᒎᒃᑯᑦ ᐊᖏᓂᖅᓴᓂᑦ ᐱᓕᕆᐊᑦᓴᖏᓐᓄᑦ. ᑕᐃᒪᙵᓂ ᐃᓚᐅᓕᔪᒻᒪᑦ ᑲᒻᐸᓂᐅᔪᒧᑦ 2006-ᒥ, ᐱᓕᕆᐊᖃᖅᓯᒪᔪᖅ ᐊᔾᔨᒌᙱᑦᑐᓂᑦ ᐱᓕᕆᐊᑦᓴᓂᑦ ᐱᔨᑦᓯᕋᖅᑕᐅᔪᓄᑦ ᑭᒡᒐᖅᑐᐃᔪᓂᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ ᐊᒻᒪᓗ ᒐᕙᒪᑐᖃᒃᑯᓐᓂ, ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ ᐊᒻᒪᓗ ᓇᒻᒥᓂᖃᖅᑎᐅᔪᓄᑦ. ᒪᐃᓖᓐ ᐸᐃᑉᐹᖅᑖᖅᓯᒪᔪᖅ ᑎᑎᖅᑐᒐᐅᔭᕐᓂᕐᒥᑦ ᓴᓇᒪᓂᕐᒥᑦ, ᐃᓕᓐᓂᐊᖅᓯᒪᑦᓯᐊᖅᑐᓂ ᐊᔾᔨᙳᐊᓂᑦ ᓴᓇᒪᓂᕐᒥᑦ.

ᐊᔪᙱᑦᑐᐊᓗᒃ, ᐱᓕᕆᑦᓯᐊᒃᑳᓗᒃ ᐊᒻᒪᓗ ᓴᓇᒪᔪᓕᕆᔨᒻᒪᕆᐅᓪᓗᓂ ᐊᕐᕌᒍᓄᑦ 16 ᐅᖓᑖᓄᑦ ᐱᓕᕆᓂᑰᓪᓗᓂ ᓂᐅᕕᐊᑦᓴᖃᕋᓱᐊᕐᓂᕐᒥᑦ ᐊᒻᒪᓗ ᑐᓴᐅᒪᔪᓕᕆᓂᕐᒥᑦ. ᐃᓕᓐᓂᐊᖅᓯᒪᑦᓯᐊᖅᑐᓂ ᓴᓇᒪᓕᕆᓂᕐᒧᑦ ᓯᐊᕆᑕᓐ ᓯᓚᑦᑐᖅᓴᕐᕕᖓᓂ, ᐃᓕᓐᓂᐊᕐᕕᒃ ᓴᓇᓂᕐᒧᑦ ᐊᒻᒪᓗ ᖃᕋᓴᐅᔭᓕᕆᔾᔪᑎᓄᑦ, ᐋᓐᑐᕋᐃ ᐊᔾᔨᒌᙱᑦᑐᓂᑦ ᐊᔪᙱᑕᒥᓂ ᐊᑐᖃᑦᑕᖅᑐᖅ ᓴᖅᑮᓂᕐᒥᑦ ᐋᖅᑭᒋᐊᕈᑎᑦᓴᓂᑦ ᐊᑑᑎᖃᖅᑐᓂᒃ ᐊᒻᒪᓗ ᐃᖅᑲᓇᐃᒪᓇᖅᑐᓂᒃ.

ᐃᖅᑲᓇᐃᔭᖃᑎᖃᖅᓯᒪᓪᓗᓂ ᐊᔾᔨᒌᙱᑦᑐᓂᑦ ᐱᔨᑦᑎᕋᕈᑕᐅᔪᓂᒃ ᐱᒋᐊᓕᕋᑖᖅᑐᓂᑦ ᐊᖏᔫᑎᓄᑦ ᑯᐊᐸᕇᓴᓄᑦ, ᐋᓐᑐᕋᐃ ᖁᕕᐊᓱᐃᓐᓇᐅᔭᖅᑐᖅ ᖃᐅᔨᓇᓱᐊᕐᓂᕐᒥᑦ ᓴᓇᒪᑎᑦᓯᓂᕐᒥᑦ ᐊᔾᔨᒌᙱᑦᑐᒃᑯᑦ, ᑲᔪᓯᓂᖃᖅᓱᓂ ᐱᐅᓯᕚᓪᓕᖅᑎᑦᓯᓂᕐᒥᑦ ᐊᒻᒪᓗ ᐃᓕᓐᓂᐊᕐᓂᕐᒥᑦ ᑭᓱᑐᐃᓐᓇᕐᒥᑦ ᓄᑖᖑᔪᒥ ᖃᐅᑕᒫᑦ ᐊᒻᒪᓗ ᐃᓕᓴᖅᓯᓲᖅ ᐃᓱᒪᒋᔭᖏᑦ ᓴᖅᑭᓪᓗᓂᒋᑦ ᓴᓇᒪᔪᓕᕆᓂᖅ ᐊᓯᔾᔨᖅᐸᓪᓕᐊᖏᓐᓇᐅᔭᖅᑎᓪᓗᒍ.

ᓴᓇᒪᔪᓕᕆᔨᒻᒪᕆᐅᓪᓗᓂ ᐋᓐᑐᕋᐃ ᐃᓱᒪᑐᔪᓂᑦ ᐱᓕᕆᖃᑎᒌᖑᔪᓂᑦ ᐃᖅᑲᓇᐃᔭᖃᑎᖃᓲᖅ ᐋᖅᑭᑦᓱᐃᓂᕐᒥᑦ ᑕᑯᑦᓴᐅᑎᑦᓯᔪᒻᒪᕆᐊᓗᓐᓂᒃ ᓱᓇᒃᑯᑖᓂᑦ ᐱᔨᑦᓯᕋᖅᑕᕗᑦ ᓈᒻᒪᒋᔭᖏᓐᓂᒃ ᐊᒻᒪᓗ ᑐᕌᖅᑕᐅᓇᓱᐊᖅᑐᓄᑦ.

ᐃᓅᓕᓚᐅᖅᓯᒪᔪᖅ ᐊᒻᒪᓗ ᐱᕈᖅᓴᓯᒪᓪᓗᓂ ᕼᐋᒧᓪᑕ, ᐊᓐᓂᐊᕆᐅᒥ, ᕋᐃᐊᓐ ᐃᖅᑲᓇᐃᔮᖃᓕᓚᐅᖅᓯᒪᔪᖅ ᑕᐅᑦᑐᕆᔭᒃᓴᓕᐅᖅᑎᐅᓂᕐᒧᑦ ᐃᓕᓐᓂᐊᕌᓂᒍᑎᓯᒪᓕᕐᓂᐊᓵᖅᓱᓂᐅᒃ ᓯᓂᑲ ᓯᓚᑦᑐᖅᓴᖅᕕᖓᑕ ᐅᑐᑦᑐᕆᔭᒃᓴᓕᐅᖅᑎᐅᓂᕐᒧᑦ ᐱᓕᕆᐊᒧᑦ 2003-ᒥ. ᑕᐃᒪᖖᒐᓂᓪᓗ, ᐊᖏᔪᒻᒪᕆᒻᒥᒃ ᐱᓕᕆᓂᖃᖅᓯᒪᓕᕐᓱᓂ ᐊᒻᒪᓗ ᖃᐅᔨᒪᓂᖃᑦᓯᐊᒻᒪᕆᒃᓱᓂ ᐱᓕᕆᐊᖃᖅᑎᐅᓂᕐᒧᑦ ᓂᐅᕕᕐᕕᐅᔪᓄᑦ ᐊᑐᑦᑐᒃᓴᓕᐅᖅᑎᐅᓂᕐᒧᑦ ᓴᓇᕝᕕᖕᓂᑦ ᐊᒻᒪᓗ ᐃᖅᑲᓇᐃᔭᕐᕕᒻᒥ ᑕᐅᑦᑐᕆᔭᒃᓴᓕᐅᖅᑎᐅᓪᓗᑎᒃ ᐃᖅᑲᓇᐃᔭᕐᕕᐅᔪᓄᑦ.

ᕋᐃᐊᓐ ᐃᖅᑲᓇᐃᔮᖓ ᑐᑭᒧᐊᒍᑎᖃᕐᐳᖅ ᓴᖖᒋᓂᖃᑦᓯᐊᖅᑐᒥᒃ ᐅᒃᐱᕆᔭᖃᕐᓂᕐᒥᓄᑦ ᑕᐅᑦᑐᕆᔭᒃᓴᓕᐅᖅᑎᐅᕙᓐᓂᖅ ᓈᒻᒪᖖᒋᓕᕈᑎᐅᓯᒪᔪᓂᒃ ᐋᖅᑭᒋᐊᕈᑎᒃᓴᓄᑦ ᓴᓇᕐᕈᑎᐅᔪᓐᓇᕐᓂᖓᑕ ᐊᒻᒪᓗ ᐱᓕᕆᔾᔪᑎᐅᕙᒍᓐᓇᕐᓂᖓᑕ ᐱᐅᓯᒋᐊᖅᑎᑦᓯᔾᔪᑎᐅᕙᒃᓗᓂ ᑐᓴᐅᒪᖃᑦᑕᐅᑎᓕᕆᔾᔪᑎᓄᑦ. ᐱᓕᕆᓂᖃᖅᓯᒪᑦᓯᐊᖅᑑᕗᑦ ᑎᑎᕋᖅᓯᒪᔪᖁᑎᑦ ᑕᐅᑦᑐᖏᓂᒃ ᐋᖅᑭᒃᓱᐃᔨᐅᔪᓐᓇᕐᓂᕐᒧᑦ ᐊᒻᒪᓗ ᑎᑎᕋᐅᔭᒐᓕᐊᖑᔪᑦ ᑕᐅᑦᑐᕆᓂᐊᖅᑕᖏᓄᑦ ᐊᒻᒪᓗ ᐅᖓᑖᓄᑦ 16 ᐅᑭᐅᓄᑦ ᐃᖅᑲᓇᐃᔭᖅᑎᒻᒪᕆᐅᓯᒪᓪᓗᓂ ᓴᓇᐅᒐᓕᐊᖑᓯᒪᔪᓕᕆᓂᕐᒧᑦ, ᓇᓗᓇᐃᒃᑯᑕᒃᓴᓕᐅᕐᓂᕐᒧᑦ, ᑎᑎᕋᖅᓯᒪᔪᑦ ᑕᐅᑦᑐᕆᓂᐊᖅᑕᖏᓂᒃ ᐊᒻᒪᓗ
ᓂᐅᕝᕈᑎᖃᖃᑦᑕᕐᓂᓕᕆᓂᕐᒧᑦ ᐱᓕᕆᐊᒃᓴᐅᕙᑦᑐᓂᒃ ᐃᓚᖏᓄᑦ ᑲᓇᑕᒥ ᖃᐅᔨᒪᔭᐅᑦᓯᐊᖅᑐᑎᒃ ᓇᓗᓇᐃᒃᑯᑕᕆᔭᐅᓕᖅᑐᓄᑦ. ᖁᕕᐊᒋᔭᖃᖅᐸᒃᑐᖅ ᐱᓕᕆᐊᖃᖅᑎᑦᓯᔨᓂᒃ ᐱᓕᕆᖃᑎᖃᖅᐸᒋᐊᒥᒃ, ᐊᒻᒪᓗ ᐋᖅᑭᒃᓱᐃᔨᐅᕙᓐᓂᕐᒧᑦ ᑕᐅᑦᑐᕆᔭᒃᓴᓕᐅᕐᓂᕐᒥ ᐋᖅᑭᒋᐊᕈᑎᒃᓴᓄᑦ ᐃᑲᔪᕐᓂᖃᓕᖅᑎᑕᐅᓂᐊᕐᓗᑎᒃ ᖃᓄᑐᐃᓐᓇᖅ – ᓂᐅᕝᕈᑎᖃᕐᓂᓕᕆᓂᖅᑎᒍᑦ ᐊᔾᔨᒌᖖᒋᐅᖅᑐᑎᒍᑦ ᐱᓕᕆᓂᐅᕙᑦᑐᓄᑦ, ᓄᑖᑎᒍᑦ ᐱᓕᕆᓂᐅᓕᖅᑐᑎᒍᑦ ᐅᕝᕙᓘᓐᓃᑦ ᐃᓅᓯᓕᕆᓂᕐᒥ ᐊᓯᔾᔩᑎᑦᓯᒪᓕᕆᐊᕐᓂᕐᓄᑦ.

ᐃᓱᒪᑕᐅᓪᓗᓂ ᑕᐅᑦᑐᕆᔭᒃᓴᓕᐅᖅᑎᐅᓪᓗᓂ, ᕋᐃᐊᓐ ᓴᓇᐅᒐᓕᐅᖅᑎᑦ ᐱᓕᕆᐊᖃᖅᑎᖏᓐᓄᑦ ᐃᓚᒋᔭᐅᕗᖅ ᐋᖅᑭᒃᓱᐃᕙᓐᓂᖏᓐᓄᑦ ᑕᑯᔪᒥᓇᖅᑑᑎᓂᒃ ᐊᒻᒪᓗ ᑕᑯᕋᓐᓂᒻᒪᕆᒃᑐᓂᒃ ᑎᑎᕋᖅᓯᒪᔪᓕᐅᖅᑎᓪᓗᒋᑦ ᐱᓕᕆᐊᖃᖅᑎᑦᓯᔨᒋᕙᑦᑕᑦᑎᓐᓄᑦ ᐊᒻᒪᓗ ᑐᕌᕐᕕᐅᓪᓗᑎᒃ ᐋᖅᑭᒃᓱᖅᑕᐅᕙᑦᑐᓄᑦ.
 

ᑭᐊᓕ ᐊᔪᙱᓐᓂᖃᑦᓯᐊᖅᑐᖅ ᐱᓕᕆᐊᖃᕐᓂᕐᒥᑦ ᑕᒻᒪᖅᓯᒪᙱᑦᑐᓂᑦ ᐱᔭᐅᔭᕆᐊᓕᓐᓂᒃ ᖃᐅᔨᓴᕐᓂᕐᒥᑦ, ᖃᓄᖅᑑᕐᓂᕐᒥᑦ, ᖃᐅᔨᕐᓂᕐᒥᑦ ᐱᔭᕆᐊᑐᔪᓂᑦ, ᐅᐸᓗᖓᖏᔭᕐᓂᒃᑯᑦ ᐸᕐᓇᐃᓂᕐᒥᑦ, ᐊᒻᒪᓗ ᐊᐅᓚᑦᓯᓂᕐᒥᑦ ᐱᓕᕆᐊᑦᓴᓂᑦ ᐊᔾᔨᒌᙱᑦᑐᓂ ᐊᖏᓂᖃᖅᑐᓂᒃ ᐊᒻᒪᓗ ᐊᑦᓱᕈᕐᓇᖅᑐᓂᑦ.

ᐊᐅᓚᑦᓯᓯᒪᔪᖅ ᐱᓕᕆᐊᑦᓴᓂᑦ ᒥᑭᔫᑎᓂᑦ ᐃᑭᐊᖅᑭᕕᓐᓂ ᐊᖏᔫᑎᓄᑦ ᑐᖅᑯᖅᑕᐅᓯᒪᔪᒃᑯᕕᓐᓄᑦ ᐃᑭᐊᖅᑭᕕᓐᓄᑦ ᐃᓗᓕᖏᓐᓄᑦ ᐊᐅᓚᑦᓯᓂᕐᒧᑦ ᐱᓕᕆᔾᔪᑎᓄᑦ ᑕᐃᒪᙵᓂ 2003-ᒥ. ᐊᕐᕌᒍᓄᑦ ᓯᑕᒪᓄᑦ, ᐱᓕᕆᔨᒻᒪᕆᐅᓂᑰᔪᖅ ᖃᕋᓴᐅᔭᓕᕆᔾᔪᑎᒧᑦ (Drupal) ᑐᙳᕕᐅᔪᒧᑦ ᐊᒻᒪᓗ ᐱᓕᕆᓂᑰᔪᖅ ᐱᔨᑦᓯᕋᖅᑕᐅᔪᓄᑦ ᐅᑭᐅᖅᑕᖅᑐᒥ ᐊᕕᑦᑐᖅᓯᒪᔪᓂ ᒐᕙᒪᒃᑯᑦ ᐱᓕᕆᕝᕕᖏᓐᓄᑦ, ᓄᓇᕗᒻᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ, ᑮᓇᐅᔾᔭᕋᓱᐊᙱᑦᑐᓄᑦ ᑲᑐᔾᔨᖃᑎᒌᖑᔪᓄᑦ, ᐊᒻᒪᓗ ᓇᒻᒥᓂᕆᔭᐅᔪᓄᑦ ᓄᓇᕘᓕᒫᒥ.

ᒫᓐᓇᕈᓘᓚᐅᖅᑐᖅ ᐱᓕᕆᐊᑦᓴᑦ ᓯᕗᒧᐊᕈᑕᐅᓚᐅᖅᑐᑦ ᑭᐊᓕᒧᑦ ᐃᓚᖃᖅᑐᑦ ᐃᑭᐊᖅᑭᕕᓐᓂ ᐋᖅᑭᑦᓱᖅᑕᐅᓯᒪᔪᑦ ᓄᓇᕗᒻᒥ ᓯᕗᓕᖅᑎᐅᑉ ᑎᑎᕋᕐᕕᖓᓄᑦ, ᓄᓇᕗᒻᒥ ᓂᕈᐊᖅᑐᓕᕆᔨᒃᑯᑦ, ᐊᒻᒪᓗ ᓄᓇᕗᑦ ᒐᕙᒪᒃᑯᑦ ᒪᓕᒐᓕᐅᕐᕕᖓᓄᑦ ᐊᒻᒪᓗ ᐋᓐᓂᐊᖃᕐᓇᙱᑦᑐᓕᕆᔨᒃᑯᖏᓐᓄᑦ.

ᐱᓕᕆᐊᑉ ᖃᓄᐃᓕᖓᓂᐊᕐᓂᖓᓂ ᐱᓕᕆᐊᖃᓲᖅ ᓴᓇᓂᕐᒥᑦ ᑕᑯᑦᓴᐅᑎᑦᓯᓂᕐᒧᑦ. ᐹᓪ ᑲᒪᒋᔭᖃᓲᖑᒻᒥᔪᖅ ᐋᖅᑭᒋᐊᖅᓯᓂᕐᒥᑦ ᐱᓕᕆᐊᖑᔪᓂᑦ ᐅᖃᐅᓯᒃᑯᑦ ᐱᔭᐅᔭᕆᐊᓕᒃᑯᑦ ᓇᓗᓇᐃᖅᑕᐅᔪᓂᑦ ᐱᔨᑦᓯᕋᕈᑕᐅᔪᒧᑦ. ᑕᕐᕆᔮᑦᓴᓄᑦ ᐱᓕᕆᐊᑦᓴᑦ ᐅᖃᐅᓯᕐᓂᒃ ᑕᑯᑦᓴᐅᑎᑦᓯᒍᓐᓇᖅᑐᑦ ᐅᕝᕙᓘᓐᓃᑦ ᐅᖃᐅᓯᕐᒧᑦ ᑐᕌᖓᑎᑕᐅᓗᑎ ᑕᑯᑦᓴᐅᓗᑎ ᐅᕝᕙᓘᓐᓃᑦ ᑕᑯᑦᓴᐅᖏᓪᓗᑎ ᑎᑎᖅᑲᖏᑦ ᓇᓕᐊᓐᓂᑐᐃᓐᓇᖅ ᓄᓇᕗᒻᒥ ᐃᓕᓴᕆᔭᐅᓯᒪᔪᓂ ᐅᖃᐅᓯᕐᓂᒃ.

ᐃᓅᓂᑰᓪᓗᓂ ᔫᓇᐃᑕᑦ ᑭᖕᑕᒻᒥᑦ, ᑕᐃᑲᓂᓗ ᑕᕐᕆᔮᑦᓴᓕᕆᓂᕐᒥᑦ ᐃᓕᓐᓂᐊᕆᐊᕐᓂᑰᓪᓗᓂ, ᐹᓪ ᓄᑦᑎᓚᐅᖅᓯᒪᔪᖅ ᑲᓇᑕᒧᑦ 2011-ᒥ. ᑕᐃᒪᙵᓂ ᐃᖅᑲᓇᐃᔭᖅᓯᒪᔪᑦ ᑕᒪᐃᓐᓂᒃ ᓴᓇᓂᕐᒥᑦ ᓇᐃᑦᑐᓂ ᐊᒻᒪᓗ ᑕᑭᔪᓂ ᓱᓕᔪᓂ ᑕᕐᕆᔮᑦᓴᓕᐊᓂᑦ, ᐊᒥᓱᑦ ᑕᑯᑦᓴᐅᑎᑕᐅᓯᒪᔪᑦ ᖁᕕᐊᓲᑕᐅᔪᓂᒃ ᐊᒻᒪᓗ ᑕᓚᕖᓴᒃᑯᑦ. ᒫᓐᓇᕈᓘᓚᐅᖅᑐᖅ ᓇᑲᑎᕆᓂᕐᒧᑦ ᐱᓕᕆᐊᖏᑦ ᐃᓚᖃᓚᐅᖅᑐᑦ ᒪᕐᕉᓐᓂᒃ ᓱᓕᔪᓂ ᑕᑭᔪᓂ ᑕᕐᕆᔮᑦᓴᓂᑦ, Here I Am ᐊᒻᒪᓗ The Guardians ᓴᖅᑭᑦᑐᒫᖅᑐᑦ ᓰᐲᓰᒃᑯᑦ 2018-ᒥ.

ᕼᐊᐃᓕ ᖁᕕᐊᒋᔭᖃᕐᑐᖅ ᐃᓅᓯᕐᒥᓂ ᐊᑐᖅᓯᒪᔭᒥᓂᒃ ᓄᓇᖃᓚᐅᖅᓯᒪᓪᓗᓂ ᓄᓇᓕᖏᓂ ᑲᖏᖅᖠᓂᐅᑉ, ᐋᑐᕙᐅᑉ, ᒪᓐᑐᕆᐋᓪ, ᐊᒻᒪᓗ ᒫᓐᓇᓵᖑᓂᖅᓴᒥ ᐃᖃᓗᓐᓂ ᓄᓇᖃᓕᖃᑕᐅᓚᐅᖅᓯᒪᓪᓗᓂ 2013-ᒥ. 

ᕼᐊᐃᓕ ᐊᖏᔪᒥᒃ ᐱᓕᕆᓂᖃᖅᓯᒪᕗᖅ ᐃᓚᖃᖅᑎᓪᓗᒋᑦ ᐊᔾᔨᒌᖖᒋᐅᖅᑐᓂᒃ ᐃᖅᑲᓇᐃᔮᖃᖅᓯᒪᓪᓗᓂ ᒐᕙᒪᑐᖃᒃᑯᑦ ᐊᒻᒪᓗ ᐊᕕᒃᑐᖅᓯᒪᓂᐅᔪᒥ ᒐᕙᒪᒋᔭᐅᔪᓂ. ᒫᓐᓇᓵᖑᓂᖅᓴᒥ ᕼᐊᐃᓕ ᐃᓱᒪᑕᐅᓪᓗᓂ ᐅᖃᐅᔾᔪᐃᒋᐊᖅᑎᐅᓚᐅᕐᑐᖅ ᐊᖑᑎᑦ ᐋᓐᓂᐊᖃᓕᖅᑕᐃᓕᒪᓂᖏᓐᓄᑦ ᓈᒻᒪᑦᓯᐊᖅᑐᒥᒃ ᐃᓅᓯᖃᕆᐊᖃᕐᓂᓕᕆᔨᑦ ᐊᓪᓚᕝᕕᖓᓂᑦ ᒐᕙᒪᒃᑯᖏᓐᓄᑦ ᓄᓇᕗᑦ ᐊᒻᒪᓗ ᓯᕗᓂᐊᓂ ᐱᓕᕆᐊᒧᑦ ᐃᖅᑲᓇᐃᔭᖅᑎᐅᓚᐅᖅᓯᒪᓪᓗᓂ ᐋᓐᓂᐊᖅᓯᐅᕐᑎᓕᕆᔨᒃᑯᑦ ᐃᖅᑲᓇᐃᔭᕐᕕᖓᓂ. ᑕᕝᕙᓂ ᐃᖅᑲᓇᐃᔮᒥᓂ ᕼᐊᐃᓕ ᐱᓕᕆᐊᒥᓂ ᑐᕌᕐᕕᖃᖅᑎᑦᓯᓚᐅᕐᑐᖅ ᓄᓇᓕᐅᔪᒥ ᐃᑲᔪᒐᒃᓴᖅᓯᐅᕐᑎᐅᓂᕐᒧᑦ ᐊᒻᒪᓗ ᓴᖅᑮᔨᐅᕙᒃᓱᓂ ᑭᒃᑯᑐᐃᓐᓇᓄᑦ ᑐᓴᒐᒃᓴᖁᑎᓂᒃ ᑐᓴᐅᒪᓕᖅᑎᑦᓯᒋᐊᕐᓂᕐᒧᑦ ᑎᐹᑭᒥᒃ ᐊᑐᖃᑦᑕᕐᓂᕐᒥᒃ ᒥᑭᓪᓕᒋᐊᖅᑎᑦᓯᓯᒪᓕᕈᑎᒃᓴᓄᑦ ᓄᓇᓕᐅᔪᓂ. ᕼᐊᐃᓕᐅᑉ ᑐᑭᓯᐅᒪᓂᕆᔭᖏᑦ ᒐᕙᒪᒃᑯᓐᓂ ᐱᓕᕆᔾᔪᓯᐅᕙᒃᑐᑦ ᐱᔾᔪᑎᒋᓪᓗᒋᑦ ᐃᑲᔪᖅᑕᐅᓯᒪᕗᒍᑦ ᓴᖅᑮᓯᒪᓕᕆᐊᒥᒃ ᐱᔨᑦᓯᕋᕈᑎᒃᓴᓂᒃ ᐱᓕᕆᐊᖃᕈᑎᔭᑦᑎᓐᓄᑦ ᑭᖑᕙᖅᑎᑕᐅᓯᒪᖖᒋᑦᑐᓂᒃ ᐊᒻᒪᓗ ᐱᓕᕆᐊᖃᑦᓯᐊᕐᓯᔪᓐᓇᖅᓱᑕ.

ᕼᐊᐃᓕ ᑐᓴᐅᒪᔪᒪᕙᑦᑐᖅ ᓄᓇᓕᐅᔪᒥ ᐊᐅᓚᑦᓯᔾᔪᓯᐅᔪᓂᑦ ᐊᒻᒪᓗ ᐊᕕᒃᑐᖅᓯᒪᓂᐅᔪᒥ ᒐᕙᒪᓕᕆᓂᐅᔪᓄᑦ ᐱᔾᔪᑎᖃᖅᑐᓂᒃ ᐊᒻᒪᓗ ᕿᓂᓕᖅᓯᒪᓪᓗᓂ ᐃᖅᑲᓇᐃᔭᖅᑎᐅᓕᕆᐊᒃᓴᒥᓄᑦ ᑭᒃᑯᑐᐃᓐᓇᓄᑦ ᐱᔨᑦᓯᕋᕐᓂᐅᔪᓂ ᐃᑲᔪᖅᑎᐅᓕᕐᓗᓂ ᓄᓇᕗᒻᒥᐅᓄᑦ ᓄᓇᓕᐅᔪᒥ ᐱᕙᓪᓕᐊᔪᓕᕆᓂᖏᓐᓄᑦ ᐊᒃᑐᐃᓯᒪᓕᖅᐸᒃᑐᓄᑦ ᖃᓄᐃᖖᒋᑦᓯᐊᕆᐊᖃᕐᓂᖏᓐᓄᑦ ᐊᕕᒃᑐᖅᓯᒪᓂᐅᔪᒥ. ᐃᖅᑲᓇᐃᔭᕐᓇᖅ ᐃᓱᓕᓯᒪᓕᕌᖓᑦ ᕼᐊᐃᓕ ᑕᕐᕆᔭᒐᒃᓴᓕᐊᖑᓯᒪᔪᓂᒃ ᑕᑯᓐᓇᕆᐊᒥᒃ, ᓄᓇᓯᐅᑎᒃᑰᕐᓗᓂ ᑎᑕᒃᑐᓂᒃ ᑐᓴᕐᓈᕆᐊᒥᒃ ᐊᒻᒪᓗ ᐃᑎᔪᓂᒃ ᐅᖃᓪᓚᐅᓯᖃᖃᑎᖃᕆᐊᒥᒃ ᖁᕕᐊᒋᔭᖃᖅᐸᒃᑐᖅ ᑕᑯᓐᓇᐅᔭᕐᓗᓂᒋᓪᓗ ᓄᓇᐅᑉ ᑕᑯᕋᓐᓂᖅᑑᓂᖏᑦ. ᓈᓚᖕᓂᖃᕈᓐᓇᕐᓂᕐᒥᓂᒃ ᓇᓗᓇᐃᖅᓯᓚᐅᕐᑐᖅ ᐃᓄᓐᓄᑦ ᐅᖃᓪᓚᕝᕕᖃᕈᒪᔪᓄᑦ ᐊᒻᒪᓗ ᐃᑲᔪᓕᕈᒪᓪᓗᓂ ᐊᓯᒥᓂᒃ ᐃᑲᔪᖅᑎᖃᕆᐊᖃᖅᐸᑕ ᖃᓄᑐᐃᓐᓇᖅ. 

ᕼᐊᐃᓕ ᐱᓕᕆᓂᖃᖅᓯᒪᕗᖅ ᐱᓕᕆᐊᒧᑦ ᐊᐅᓚᑦᓯᔨᐅᓯᒪᓪᓗᓂ ᐊᒻᒪᓗ ᑐᓴᐅᒪᖃᑦᑕᐅᑎᓕᕆᔾᔪᑎᓄᑦ ᐊᑏ-ᒎ ᑕᑯᒃᓴᑎᒍᑦ ᓯᐊᒻᒪᖅᑎᑦᓯᓂᖅ ᐱᓕᕆᐊᖃᖅᑎᖏᓄᑦ ᐊᒻᒪᓗ ᐱᓕᕆᐊᖃᖅᑎᒋᔭᐅᓪᓗᓂ ᐊᐅᓚᑦᓯᔨᐅᓂᕐᒧᑦ ᐱᓕᕆᐊᖑᑲᐃᓐᓇᖅᑐᓂᒃ ᑕᑯᓐᓇᒐᔅᓴᓕᐅᖅᑎᐅᓪᓗᑎᒃ ᐃᖅᑲᓇᐃᔭᕐᕕᑦᑎᓐᓂ.

ᐱᐊᓂ ᓄᑖᖑᓂᖅᐹᖑᔪᖅ ᐃᓚᒋᔭᐅᓪᓗᓂ ᐊᑏ−ᒎ ᐱᓕᕆᖃᑎᒌᖏᓐᓄᑦ ᐱᓯᒪᑦᓯᑐᐃᓐᓇᖏᑦᑐᖅ ᓇᒻᒥᓂᖃᕐᓂᕐᒧᑦ ᖃᐅᔨᒪᔨᑕᕐᔪᐊᖑᓂᕐᒥᑦ, ᑭᓯᐊᓂ ᐱᐅᔪᒻᒪᕆᒻᒥᒃ “ᐊᔪᕐᓇᖏᑦᑐᖅ” ᐃᓱᒪᓂᕐᒥᑦ ᐃᓚᖃᖅᓱᓂ ᑲᑐᔾᔨᖃᑎᖃᕐᓂᒃᑯᑦ, ᐋᖅᑭᑦᓱᐃᓂᕐᒥᑦ ᑐᙵᕕᖃᖅᓱᓂ ᐱᓕᕆᔾᔪᓯᕐᒥᑦ ᐱᓕᕆᐊᖃᕐᓂᕐᒧᑦ.

ᐱᐊᓂ ᓯᕗᓪᓕᖅᐹᖏᓐᓂᒃ ᐊᕐᕌᒍᓂᑦ 7-ᓂᒃ ᐃᖅᑲᓇᐃᔮᕐᒥᓂᒃ ᓂᐅᕕᐊᑦᓴᖃᕋᓱᐊᕐᓂᕐᒥᑦ ᐊᒻᒪᓗ ᓴᖅᑭᔮᖅᑎᑦᓯᓂᕐᒥᑦ ᑐᕌᓐᑐᒥ ᐊᒻᒪᓗ ᕼᐊᓕᕚᒃᓯᒥ. 2002-ᒥ ᐱᕕᖃᕐᓂᖓᓂ ᑲᔪᓯᑎᑦᓯᓚᐅᖅᑐᖅ ᑐᓴᐅᒪᔪᓕᕆᓂᕐᒧᑦ ᐊᐅᓚᑦᓯᔨᐅᓂᕐᒥᑦ ᓄᓇᕗᑦ ᒐᕙᒪᒃᑯᑦ ᐃᓕᖅᑯᓯᓕᕆᔨᒃᑯᖏᓐᓂ. ᐱᓕᕆᓂᑰᓪᓗᓂ ᐊᒥᓱᓂᑦ ᓄᓇᓕᓐᓂ ᑐᙵᕕᒋᔭᐅᔪᓂᑦ ᐱᒋᐊᕈᑎᑦᓴᓂᑦ ᓲᕐᓗ ᐃᓐᓇᕐᓄᑦ ᒪᒃᑯᒃᑐᓄᓪᓗ ᐱᓕᕆᐊᑦᓴᓄᑦ, ᐅᖃᐅᓯᕐᒥᑦ ᐊᒻᒪᓗ ᐱᖅᑯᓯᕐᒥᑦ ᐊᓯᐅᑎᑦᓯᑕᐃᓕᒪᓂᕐᒥᑦ ᐊᒻᒪᓗ ᓴᖅᑭᔮᖅᑎᑦᓯᓂᕐᒥᑦ, ᐃᑲᔪᕐᓂᕐᒥᓪᓗ ᐋᖅᑭᑦᓱᐃᓂᕐᒥᑦ ᐊᒻᒪᓗ ᓴᖅᑭᔮᖅᑎᑦᓯᓂᕐᒥᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐱᓕᕆᕝᕕᖓᓂ ᐊᒻᒪᓗ ᓯᕗᓪᓕᖅᐹᒥᑦ ᐃᓄᐃᑦ ᖃᐅᔨᒪᔭᑐᖃᖏᑦ ᑲᑎᒪᔨᖏᓐᓂᒃ, ᐅᐱᒍᓱᒻᒪᕆᓚᐅᖅᑐᖅ ᐅᑭᐅᖅᑕᖅᑑᑉ ᐃᓕᖅᑯᓯᖓᓂ ᐊᒻᒪᓗ ᐱᓕᕆᒍᒪᕐᔪᐊᓚᐅᖅᑐᖅ ᓴᐳᔾᔨᓯᒪᒍᒪᓪᓗᓂᐅᒃ. ᐅᐱᒋᓯᒪᓐᓂᖅᐹᕆᔭᖓ ᑲᔪᓯᓂᖃᑦᓯᐊᖅᓯᒪᔪᖅ ᑐᓴᐅᒪᔪᓕᕆᓂᕐᒧᑦ ᓯᕗᓕᖅᑎᐅᓂᕆᓚᐅᖅᑕᖓ ᑖᑦᓱᒧᖓ ᓄᓇᕗᑦ, ᐅᓪᓗᒥᓯᐅᑏᑦ ᓴᓇᐅᒐᑦ ᐅᑭᐅᖅᑕᖅᑐᒥ, ᓯᕗᓪᓕᖅᐹᒥᑦ ᑕᑯᑦᓴᐅᑎᑕᐅᔪᑦ ᐊᐅᓪᓚᕈᔾᔭᐅᓚᐅᖅᑐᑦ ᑲᓇᑕᐅᑉ ᓯᓚᑖᓄᑦ. 2006-ᒥ ᐱᐊᓂ ᓄᑦᑎᓚᐅᖅᑐᖅ ᑭᐊᓪᒋᐊᕆᒧᑦ ᑖᕙᓂ ᐃᖅᑲᓇᐃᔭᓚᐅᖅᑐᖅ ᑭᐊᓪᒋᐊᕆᐅᑉ ᓄᓇᓕᐸᐅᔭᒃᑯᖏᓐᓄᑦ ᐊᕐᕌᒍᓄᑦ 12-ᓄᑦ ᐊᔾᔨᒌᙱᑦᑐᓄᑦ ᐃᓚᒋᓪᓗᓂᐅᒃ ᑐᓴᐅᒪᔪᓕᕆᔨᒃᑯᓐᓄᑦ, ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ, ᐃᓕᓐᓂᐊᕐᓂᕐᒧᑦ ᐊᒻᒪᓗ ᐱᕙᓪᓕᐊᑎᑦᓯᓂᕐᒧᑦ, ᐃᓄᓕᕆᓂᖅ ᐊᒻᒪᓗ ᐃᓕᖅᑯᓯᓕᕆᓂᖅ, ᐋᖅᑭᑦᓱᐃᓂᕐᒥᑦ ᐊᓯᔾᔩᓂᕐᒥᑦ ᐊᒻᒪᓗ ᓇᒻᒥᓂᕆᔭᐅᔪᒧᑦ ᐅᐸᓗᖓᐃᔭᐃᓂᕐᒥᑦ. 2017 ᐃᓱᐊᓂ, ᐱᐊᓂ ᐃᖅᑲᓇᐃᔮᕆᔭᒥᓂ ᐊᓯᔾᔩᕈᒪᓕᓚᐅᖅᑐᖅ ᐊᒻᒪᓗ ᐊᓯᐊᓅᖔᓕᓚᐅᖅᑐᖅ ᖃᐅᔨᒃᑲᐃᔨᐅᓂᕐᒧᑦ ᐊᒻᒪᓗ ᐅᑎᕐᓗᓂ ᖁᕕᐊᒋᓂᖅᐹᕆᔭᖓᓄᑦ ᐅᑭᐅᖅᑕᖅᑐᒥ ᐃᖅᑲᓇᐃᔭᕐᓂᕐᒥᑦ.

ᐱᐊᓂ ᓯᕗᓕᖅᑎᐅᓂᐊᖅᑐᖅ ᑐᓴᐅᒪᔪᓕᕆᓂᕐᒧᑦ ᐊᒻᒪᓗ ᐅᐸᓗᖓᐃᔭᕐᓂᕐᒧᑦ ᐸᕐᓇᐃᓂᕐᒥᑦ ᐊᒻᒪᓗ ᐋᖅᑭᐅᒪᑎᑦᓯᓂᕐᒥᑦ ᐊᒻᒪᓗ ᖃᓄᐃᓕᐅᕈᑕᐅᔪᓂᑦ ᐊᐅᓚᑦᓯᓂᕐᒥᑦ.